पुणे : ‘शहराच्या दक्षिण भागातील कात्रज, कोंढवा, अरण्येश्वर, टांगेवाला कॉलनी, तावरे कॉलनी, शिवदर्शन, पर्वती दर्शन, जनता वसाहत, दांडेकर पूल, पानमळा, सिंहगड रस्ता आदी भागातील पूरग्रस्त नागरिकांना येत्या तीन दिवसात संसारोपयोगी आणि जीवनावश्यनक वस्तू मिळाव्यात यासाठी विविध स्वयंसेवी संस्थांशी संपर्क करण्यात आला असून, त्यांच्या वतीने तसेच पालिका प्रशासनाकडूनदेखील पूरग्रस्त नागरिकांना आवश्यक ती सर्व मदत मिळेल,’ अशी माहिती भारतीय जनता पक्षाच्या शहराध्यक्षा आमदार माधुरी मिसाळ यांनी दिली.
जिल्हाधिकारी नवल किशोर राम आणि महापालिका आयुक्त सौरभ राव यांच्याबरोबर झालेल्या चर्चेनंतर त्यांनी ही माहिती दिली.
‘पुरामध्ये ज्यांची घरे पडली आहेत त्यांना त्यांचे घर उभारून होईपर्यंत दरमहा तीन हजार रुपये याप्रमाणे १२ महिन्यांचे ३६ हजार रुपये भाडे जिल्हा प्रशासनाकडून मिळेल; तसेच खर्चासाठी १५ हजार रुपये देण्यात येतील. त्याशिवाय अन्नधान्य, कपडे, भांडी अशी आवश्यक मदत स्वयंसेवी संस्था आणि जिल्हा प्रशासनाकडून मिळणार आहे. वीज पुरवठा, पाणी पुरवठा सुरळीत करण्याबाबत; तसेच पूरग्रस्त भागातील राडारोडा, चिखल दूर करण्यासाठी पाठपुरावा सुरू आहे,’असेही मिसाळ यांनी सांगितले.
